Jer 11 | MEU | STEP | Ina hereva na Iehova ena amo ema, Ieremia enai:

Jeremiah 11

Taravatu itata-utuna

1 Ina hereva na Iehova ena amo ema, Ieremia enai: 2 Ina taravatu herevadia ba kamonai, bona Iuda taudia bona Ierusalem inoholaina taudia ba hereva henidia. 3 Ba hamaorodia, baoto, Iehova, Israel Diravana, na ini e gwau tomamu: Ina taravatu herevadia basine kamonai henidia tauna na bae uduguiraia. 4 Taravatuna binai senemui na haḡanilaidia, Aigupto tanona, auri amuna, amo na hakaudia lasi negana ai, nato, Lau gadogu ba kamonai, bona na haḡanilaimuimu karadia iboudiai na ba. kara, unu amo umui na egu bese ai baola bona lau na emui Dirava ai bainala; 5 bena senemui na gwaurai henidia gwauhamatana, nato rata bona badaranuna e arumu tanona baina henimui, na baina hamomokania, hari ina dina ai heḡereḡerena. Bena lau na haere, nato, Iehova e, unu baine heto.

6 Bena Iehova ese e hamaorogu, eto, Ini hereva iboudiai na Iuda hanuadia ai bona Ierusalem ariaradia ai ba g vaurai hedinarai, baoto: Ina taravatu herevadia ba kamonai, bona karadia ba kara. 7 Badina be senemui na sisiba henidia auka, Aigupto tanona amo na hakaudia lasi negana ai, na sisiba henidia loulou, asina hesiku, ema bona ina dina ai, nato, Lau gadogu ba kamonai. 8 Ḡau tamona, asie kamonai henigu bona taiadia asie hakala, a iboudiai na edia lalo-hadai dikadia ai bona edia lalo-auka ai e raka. Taunabunai, ina taravatu herevadia iboudiai, na haḡanidia bae kara to asie kara ḡaudia, na idia latadiai na hadihodia.

9 Iehova ese ma e hamaorogu, eto, Iuda taudia bona Ierusalem inoholaina taudia bogaragidiai haida na e gwau dagemu. 10 Idia ese senedia, egu hereva ikamonaidia asie urava taudia, edia kara havara vada e lou heni, dirava idaudia muridiai vada ela, isiaidia bae lao heni totona. Israel besena bona Iuda besena taudia ese egu taravatu, senedia na henidia ḡauna, vada e tataia utu. 11 Taunabunai, Iehova na ini e gwau tomamu: Lau ese dika na latadiai ba hadihoamu, basie roho mauri diba; ena be bae tai henigu, to basina kamonai. 12 Bena Iuda hanuadia bona Ierusalem inoholaina taudia na baela, muramura mai bonadia e gabu henidiamu diravadia bae tai henidia, to edia hekwakwanai negana ai unu idia ese basie hamauridia diba. 13 Badina be, Iuda e, emui dirava na emui hanua hohodia heḡereḡeredia; bona ihaboulaina patadia vada o hadai, sibomui ihahemaraimui, latadiai muramura mai bonadia Baal ba gabu henia totona, na Ierusalem ariaradia hohodia heḡereḡeredia.

14 Taunabunai, ina bese taudia daidiai basio ḡuriḡuri; idia daidiai basio tai bona basio noinoi. Badina be edia hekwakwanai negana ai bae boi henigu, to lau na basina kamonai. 15 Egu lalokau hahinena ese kara dikadia e karamu bena egu ruma ai e raka vareaimu na maoro eiava? Gwauhamata bona boubou ḡaudia hidiodia ese ihabua-tarimui baine laoa ahu diba a? Bena ba heaḡi diba a? 16 Nega ta ai Iehova ese e gwauraimu “Olive auna maurina, huahuana e dobi badabadamu ḡauna”; a mai lai-gubana bada-hereana ida ia ese baine ha-araia, bena rigina bae ara ore. 17 Iehova Sabaota, e hadomui Diravana, ese dika na latamui ai vada e gwauraia, badina be Israel besena bona Iuda besena vada e kara dika, bona vada e habadugu, muramura mai bonadia na Baal e gabu henia dainai.

Ieremia ihadikana e henegalaia

18 Iehova ese e hadibagu, bena na diba;
bena edia kara dika o haheitalaigu.
19 A lau na mamoe natuna manadana ta
bae alaia mase gabuna e hakaua laomu na heto.
Asi dibagu lau ihadikagu totona e henega bou, eto,
Au mai huahuana ida baita habuadia tari,
mauri taudia edia tano amo baita negea daure,
ia ladana basie laloa tao helaoreana.
20 A Iehova Sabaota e, oi ese o hahemaoro ḡoevaḡoevamu,
oi ese taunimanima lalodia bona daradia o dibadiamu;
emu dava-ihenina idia latadiai na bama itaia,
badina be egu dala na oi imamu ai vada na atoa.
21 Taunabunai, hari Anatoto taudia, egu mauri iabi-ohona e tahuamu, e tomu “Iehova ladana ai basio peroveta, ai imamai amo ba mase na garina”, taudia na Iehova ese ini e herevalaia tomamu. 22 Taunabunai, Iehova Sabaota na e tomu, A itaia, davadia baina henidia; eregabe taudia na dare ai bae mase; natudia mamaruanedia bona hahinedia na hitolo ese baine hamasedia; 23 idia ta basine mauri. Badina be dika na Anatoto taudia latadiai baina hadihoa, edia dika davana ihenina laḡanina ai.